काठमाण्डौंः राष्ट्रपति विद्यादेवी भण्डारीले संवैधानिक परिषद् सम्बन्धी अध्यादेश २०७७ जारी गरेकी छन् । प्रधानमन्त्री निवाश बालुवाटारमा बसेको मन्त्रीपरिषद्को बैठकले पारित गरेको अध्यादेशलाई राष्ट्रपतिले जारी गरेकी हुन् ।
सरकारले बहुमत सदस्यको उपस्थितिमै संवैधानिक परिषदको बैठक बस्न सक्ने गरी अध्यादेश ल्याएको हो । राष्ट्रपति कार्यालयले संवैधानिक परिषद (काम, कर्तव्य, अधिकार र कार्यविधि) सम्बन्धी अध्यादेश जारी भएको जनाएको छ।
संवैधानिक परिषद्को काम कर्तव्य र अधिकार सम्बन्धि ऐनको दफा ६ को उपदफा ३ मा बैठक बस्न अध्यक्ष र अन्य चार जना उपस्थित हुनुपर्ने व्यवस्था छ। हाल उपसभामुख पद रिक्त छ । सभामुख अग्नि सापकोटा भने बैठकमा विभिन्न कारणले अनुपस्थित हुँदै छन्।
मंगलबार सभामुख अग्निप्रसाद सापकोटाको अनुपस्थिति पछि परिषद बैठक स्थगित भएपछि प्रधानमन्त्री केपी शर्मा ओलीले आकस्मिक रुपमा मन्त्रिपरिषद बैठक बोलाएका थिए । बैठकलगत्तै राष्ट्रपति विद्यादेवी भण्डारीले संवैधानिक परिषद् सम्बन्धी अध्यादेश २०७७ जारी गरेकी हुन् ।
सोमबार जारी भएको अध्यादेश अनुसार परिषद्को बैठक बस्न अब ५ जनाको कोरम पुग्नु पर्दैन । यो अध्यादेशसँगै प्रधानमन्त्री ओलीलाई आफु निकटलाई संवैधानिक निकायमा नियुक्त गर्ने बाटो खुलेको छ ।
