काठमाण्डौं: प्रतिबन्धित नेपाल कम्युनिस्ट पार्टी (विप्लव) समुहले भारतले आफ्नो देशको नक्सामा नेपालको कालापानी, लिपुलेक र लिम्पियाधुरा सहितको भू-भागलाई भारतीय नक्सामा समेटिएको बिरोधमा संघर्षका कार्यक्रम घोषणा गरेको छ ।
सो पार्टीका महासचिव विप्लवको नाममा बुधबार जारी गरिएको विज्ञप्ति अनुसार भारतको सो कदम नेपाल माथिको अतिक्रमणकारी रवैया र हमला भन्दै एकहप्ते बृहत् संघर्षका कार्यक्रम घोषणा गरेको जनाएको हो ।
घोषित संघर्षका कार्यक्रम अनुसार नेपालका लागी भारतीय राजदुतावासमा ज्ञापनपत्र बुझाउनेदेखि भारतीय प्रधानमन्त्री नरेन्द्र मोदीको पुत्ला जलाउने सम्मका कार्यक्रम घोषणा गरिएको छ ।
उक्त विज्ञप्तिमा जनाइए अनुसार कात्तिक २१ गते विहिवार मसाल जुलुश प्रदर्शन गर्ने, २२ गते शुक्रबार कोणसभा, २३ गते शनिवार भारतीय दुतावासमा ज्ञापनपत्र बुझाउने, २४ गते अतिक्रमित भारतीय नक्सा जलाउने, २५ गते विरोध प्रदर्शन गर्ने, २६ गते भारतीय प्रधानमन्त्रीको पुत्ला दहन गर्ने र कार्तिक २७ गते संयुक्त राष्ट्रसंघको नेपालस्थित कार्यालयमा विरोध पत्र दिने उल्लेख छ ।
विज्ञप्तीमा महासचिव विप्लवले भारतले तत्काल उक्त साम्राज्यवादी नक्सा खारेज गर्न चेतावनीसमेत दिएका छन् । ‘अन्यथा पार्टीले राष्ट्रिय स्वाधिनताको आन्दोलन सञ्चालन गर्ने चेतावनी दिन चाहन्छ’ विज्ञप्तिमा छ, ‘यो मुक्ति स्वाधिनताको संघर्षमा सम्पूर्ण पार्टी, देशभक्त, वामपन्थी, लोकतन्त्रवादी, प्रगतिशील र सबै क्षेत्रका जनतासँग एकजुट भएर उठ्न अपिल गर्दछ ।’
बुधबार जारी गरिएको प्रेश विज्ञप्तिको पूर्णपाठः
