काठमाडौः राष्ट्रिय मानवअधिकार आयोगले कपिलवस्तु घटनामा आयोगको ध्यानाकर्षण भएको भन्दै सरकार र सम्बन्धित पक्षलाई सामाजिक सद्भाव कायम राख्दै संयमित रूपमा आफ्ना गतिविधिहरु सञ्चालन गर्न आग्रह गरेको छ ।
आयोगका निर्देशक मुरारीप्रसाद खरेलले बिहीबार एक प्रेस विज्ञप्ति जारी गरी सरकार र सम्बन्धित पक्षलाई सामाजिक सद्भाव कायम राख्दै संयमित रूपमा आफ्ना गतिविधिहरु सञ्चालन गर्न आग्रह गरिएको हो ।
लक्ष्मी पूजाको मूर्ति विसर्जन गर्ने विषयलाई लिएर कपिलवस्तुको कृष्णनगरमा बुधबार हिन्दु मुसलमान समुहबीच विवाद सिर्जना भई झडप भएपछि स्थानीय प्रशासनले कर्फ्यु आदेश जारी गरेको र गोली लागेर एक जना भारतीय नागरिकको मृत्यु भएको घटनाप्रति आयोगले ध्यानाकर्षण भएको जनाएको छ ।
उक्त घटना सम्बन्धमा अनुगमन गर्न आयोगको प्रदेश कार्यालय रूपन्देहीबाट अनुगमन टोली बिहीबारै घटनास्थल पुगी अनुगमन गरिरहेको समेत आयोगले प्रस्ट पारेको छ ।
