काठमाण्डौं : प्रधानमन्त्री केपी शर्मा ओलीले नेपाल टेलिकमको फोरजी सेवाको स्विच दबाएर भिडियो कल मार्फत औपचारिक रुपमा सुरुवात भएको घोषणा गरेका छन् ।
बुधबार अपरान्ह प्रधानमन्त्री ओलीले एक समारोहका बिच सातवटै प्रदेशमा 4G सेवाको शुभारम्भ भएको घोषणा गरेको हो । फोरजी सेवा विस्तार गर्ने परियोजना अन्तर्गत पहिलो चरणमा ठुला र साना शहरहरु गरी कुल ५० भन्दा बढी जिल्लाहरूमा एकैसाथ चौथो पुस्ताको फोरजी सेवा सञ्चालनमा ल्याएको टेलिकमका प्रबन्ध निर्देशक डिल्ली अधिकारीले बताएका छन् ।
मुख्य शहर अन्तर्गत दमक, बिर्तामोड, धरान, विराटनगर, इटहरी, जनकपुर, वीरगञ्ज, हेटौँडा, भरतपुर, बुटवल, नेपालगन्ज, धनगढी लगायत रहेका छन् । साथै साना शहरहरु रुकुम, बागलुङ, महोत्तरी, रौतहट, सिरहा, बर्दिया, दाङ, धनकुटा, कैलाली, कपिलवस्तु, म्याग्दी, नवलपरासी, पाल्पा, पर्वत लगायतका जिल्लामा आजैदेखि फोरजी सेवा सुरु भएको टेलिकमले जनाएको छ।
फोरजी र एलटीई सेवा एडभान्स प्रविधियुक्त हुने प्राविधिकहरुको भनाई रहेको छ । यसअघि २०७३ पुस १७ मा काठमाडौं र पोखरामा मात्र उपलब्ध फोर जी सेवा बुधवार बेलुकाबाट ७ वटै प्रदेशका ३२ जिल्लाहरूमा संचालनमा आएको छ ।
