काठमाण्डौः मदन पुरस्कार गुठीले ‘मदन पुरस्कार–२०७६’का लागि सात पुस्तक छनोट गरेको छ । २०७६ मा प्रकाशित भएर प्राप्त भएका १५१ पुस्तक मध्येबाट पुरस्कारका लागि ७ पुस्तक छनोट गरेको गुठीले जनाएको छ ।
गुठीले मदन पुरस्कारका लागि विमल निभाको ’जोकरको बन्दुक’, तीर्थ श्रेष्ठको ’धर्सैधर्साको चक्रव्यूह’, भुवन ढुङ्गानाको ’परित्यक्ता’, योगी धर्ममहारसको ’महारसनिघण्टु (खण्ड १ – ३)’, चन्द्रप्रकाश बानियाँको ’महारानी’, ललित बिष्टको ’मोहपथ’ र शारदा शर्माको ’यात्रामा’ छनोट गरेको छ ।
प्राप्त पुस्तकमध्येबाट बढीमा उत्कृष्ट १० पुस्तकको सूची तयार गर्न गठन भएको समितिले सात पुस्तकको सूची गुठीलाई उपलब्ध गराएको हो । छनोटमा परेका यी पुस्तकमध्ये एउटा पुस्तकलाई २०७६ सालको मदन पुरस्कार दिइने बताइएको छ ।
