काठमाण्डौ : यातायात व्यवस्था विभागले राजधानीबाट दशैँमा बाहिरिने यात्रुहरुका लागि अग्रिम टिकट बुकिङ खुला गरेको छ । विभागका महानिर्देशक गोगनबहादुर हमालका अनुसार आइतबार बिहान १० बजेदेखी टिकट बुकिङ खुला गरेको हो ।
बुकिङ खुला गर्नु अघिल्लो दिन शनिबार नयाँ बसपार्कमा यात्रु बोक्ने गाडीको प्राविधिक पक्षको चेकजाँच समेत गरिएको विभागको दावी छ । हमालका अनुसार असोज १० गतेबाट सुरु गर्ने भनिएको नागरिक सहायता कक्ष टिकट बुकिङसँगै आजैदेखी सुरु भएको बताएका छन् ।
उपत्यकाका काठमाण्डौ र भक्तपुरका विभिन्न स्थान (गौशाला, नयाँबसपार्क, चाबहिल, कोटेश्वर, बल्खु, कलंकी, नागढुंगा) बाट टिकट बुकिङ खुला रहनेछ । टिकट काउन्टर रहेका स्थानमा ट्राफिक प्रहरी, यातायात व्यवस्था विभागका कर्मचारी, उपभोक्ता समाजका प्रतिनिधिहरूको समेत उपस्थिति रहनेछ । यसको साथै दशैँका बेला टिकट लिन यात्रुहरुलाई सजिलो होस भनेर यातायात व्यवस्था विभागबाट अनुगमन टोली र नेपाल प्रहरीले सादा पोशाकमा प्रहरी खटाई सकेको विभागले जनाएको छ ।
